Батырлар шулай тәрбияләнә

“Эльдорадо” электроника кибетләр челтәре кубогы призына милли көрәш буенча турнир быел 10 нчы мәртәбә уздырылды.

Милли традицияне дәвам итүче бил бирмәс егетләрнең осталыгы елдан-ел камилләшә. Монда милли көрәш буенча да­ими уздырылучы ярышларның да йогынтысы зур.

Эльдорадо кубогы турниры “Юбилейный” спорт комплек­сында оештырылды. Чарада район башлыгы сүз алды:

– Быел бу турнирның кечкенә юбилее. Бәйгедә катнашу­чыларга күтәренке кәеф һәм җиңүләр телим! – диде. Аннары ул өч егеткә республика көрәш бәйгеләрендә өченче урынны алганнары өчен махсус премия һәм кыйммәтле бүләк тапшыр­ды. Республика күләмендәге ярышларда катнашып, беренче урынны алган спортчыга – 15 мең, икенчегә – 10 мең, өченчегә 5 мең сум күләмендә махсус премияне Язкәр Миңнуллович үз фондыннан бирәчәк.

Бу бәйгедә Иркәнәш, Хуҗә- мәт, Кадрәк, Матвеевка, авыл хуҗалыгы техникумы, гимназиядә укучылар көч сы­наштылар. Катнашучылар узган ел 12 авырлык категориясендә көрәшсәләр, быел 14 төрле авырлык категориясендә 102 спортчы ярышты. Нәтиҗәдә Хуҗәмәт командасы – бе­ренче, техникум – икенче, Иркәнәш – өченче, Матвеев­ка дүртенче урынны яулады. Җиңүче команда кубок һәм зур тәкә белән бүләкләнде. Беренче өч урынны алган командаларның тренерлары: Флүр Галиев, Рәмзил Бәдриев, Фәнияр Гәрәевкә Дипломнар һәм кыйммәтле бүләкләр тап­шырылды. Районыбызда мил­ли көрәшне үстерүгә Хуҗәмәт РМЗсы, Кадрәк, Иркәнәш авыл җирлекләре җитди игътибар бирә. Ык арты зонасында – Калтакта көрәшне тагын да җанландыру өчен Радик Фатта­хов Иркәнәш тренеры Фәнияр Гәрәев белән сөйләшүләр алып бара, тиздән Калтакта да көрәш җанланып китәр дигән өмет бар. Ә менә узган елларда Урыс урта мәктәбе командасы ярыш­ларда призлы урыннарны ала иде, хәзер монда көрәш сүнде. Шулай булса да, Гөлек авылына көрәшчеләрне тәрбияләү өчен махсус маты бирелде.

Шәхси беренчелектә 1997 һәм аннан да яшьрәкләр ара­сында үз авырлык категория- ләрендә Тәлгать Талипов, Ру­нар Искәндәров, Айзат Юсу­пов, Илнур Вәлиуллин, Айнур Гарипов, Айнур Вәлиуллин (алтысы да Хуҗәмәттән), Ка­мил Хуҗин (Кадрәк), Данир Ка­гиров, Данир Талипов (икесе дә Хуҗәмәттән), Айдар Фатта­хов (1 нче урта мәктәп), Илнур Габдрахманов (техникум), Ил­дус Мияссаров (Кадрәк), Данис Гәрәев (Иркәнәш), Данил Гәрәев (Хуҗәмәт) беренче урын­ны яуладылар. Җиңүчеләргә грамоталар, медальләр һәм кыйммәтле бүләкләр тапшы­рылды.

Бәйге югары дәрәҗәдә үтте, турнирны оештыру һәм мат­ди ярдәм күрсәткәне өчен Язкәр әфәндегә рәхмәттән башка сүз юк. Көрәш – спорт төре генә түгел, татар халкы мәдәниятенең, тарихының ае­рылмас бер өлеше. Димәк, рай­оныбызда бу спорт тагын да зуррак игътибар таләп итә.

безнең белешмә

Минзәлә элек-электән кө- рәшчеләре белән дан тот­кан. Сабантуйларда, милли бәйрәмнәрдә мәйданга бил бирмәс көрәшчеләр чыккан. Җиңүчеләргә чигелгән сөлге һәм тәкә бүләк иткәннәр. Соңгы елларда бу спорт төре районы­бызда популярлашып китте. Районыбызда милли көрәшкә зур игътибар бирелә. Минзәлә төбәген данлаган, республика­да һәм Россия күләмендә төрле елларда танылу алган батырла­рыбыз белән хаклы рәвештә го­рурланабыз. Шулар арасыннан Раббани ага Гайфуллин, Фрил Әхмәтов, Мәүләветдин Закиров, Илнар һәм Илнур Камаловлар, Марат Нәҗмиев, Ленар һәм Ирек Заһриевлар, Фәрит Хәмәтдинов. Яшь буынны алар үрнәгендә тәрбияләү өчен Язкәр Биҗанов, Рәмзил Бәдриев күп көч сала.

Районыбызда әлеге спортны үстерү, яшьләрне, сәламәт яшәү рәвешенә җәлеп итү максатында район хакимияте башлыгы Ай­дар Салахов карары нигезендә Көрәш федерациясе оештырыл­ды. Аның башкарма директоры итеп Язкәр Биҗанов, көрәш бу­енча баш тренер итеп Рәмзил әфәнде билгеләнде.