50 млн сумга якын

Быел Минзәлә районында җирле әһәмияткә ия булган гомуми файдаланудагы юллар төзелешенә җирле һәм республика бюджетыннан әнә шул кадәр акча бүлеп биреләчәк.

Шушы көннәрдә рай­онда мондый юлларда юл эшләре башкару про­граммасына кертелгән объектларның исемлеге билгеле булды. Әлеге суммага кайсы юлларда нинди эшләр планлаш­тырыла соң? Бу хакта район башкарма коми­теты җитәкчесенең ин­фраструктура үсеше буенча урынбасары Вәсил Гыйләҗетдинов түбәндәгеләрне сөйләде:

– Быел Шикәрле Каен, Бикбау (Садовая урамы), Каран Азик, Тулбай авыл­ларында урам юлларын комлы вак таш белән нор­матив хәлгә китерү план­лаштырыла. Моның өчен җирле бюджеттан 14 млн 700 мең сум акча бүлеп биреләчәк.

Республика бюдже­тыннан бирелгән 15 млн сумга шәһәрдәге К.Маркс урамы, Изыскательләр урамы, 2/11А, 4/4 ке­бек күпкатлы йортлар яны территорияләрен һәм шәһәр урамнарын асфальтлау күздә то­тыла. Моннан тыш ре­спублика бюджетыннан бүлеп бирелгән 20 млн сумга 2015 елда дәүләт программалары буен­ча төзелә торган объ­ектларга (Яңа Маҗын, Дәвек авылларында мо­дульле ФАПлар, Кадрәк авылында ветпункт, На­ратлы Кичү авылында күпфункцияле иҗтимагый үзәк, шәһәрдәге Черны­шевский урамында, Иске Матвеевка авылында спорт мәйданчыклары) керү юллары комлы вак таш белән норматив хәлгә китереләчәк.

15 апрельдән 14 майга кадәр юлларда авыр йөк транспортына чикләүләр кертелү белән беррәттән, шәһәр урамнарындагы кышкы чордан һәм язгы кар суларыннан соң уры­ны белән чокырланып калган юлларны “ямау” эшләре башланып китте.

– Шәһәр урамнарында башкарылачак мондый ремонт эшләре җирле бюджет хисабына алып барыла. 500 кв.м дан 1000 кв.м га кадәр эш башка­ру күздә тотыла. Ремонт эшләренә 800 мең сумга якын акча бүлеп бирел­де инде, – диде “Чиста шәһәр” МУП директоры Алексей Вышенский.

Юл эшчеләре быелгы сезонны шәһәрнең Чаллы трактындагы, М.Җәлил, К.Маркс урамындагы юлларны ремонтлаудан башлап җибәрделәр. Юл­лардагы чокыр-чакырлар­ны ямау эшләре май аен­да да алып барылачак.

безнең өстәмә

Юл эшләренә каток, компрессор, фрез тагыл­ган МТЗ-80 тракторы кебек техника җәлеп ителә, юлларны “ямауда” мастер Владимир Сомов җитәкчелегендә шушы техниканы иярләүче ма­шинист Александр Еньков, механизатор Михаил Мордвинов, юл эшчеләре Виктор Тарасов, Генна­дий Петров эшли.

Флүрә МУСИНА